Écrits Picards

Qué boin piot, mais qu’il est rédeux ! Énhui, chés coureus du Tour de France is sont passès leu doù qu’tout piot j’avouos cminchè à m’édviseu aveuc mi-meume. Mi tout seu. Aveuc mi-meume. Pasqu’éj n’existouos qu’à mitan : mn’orelle al parlouot eune langue qu’ém bouque (min grand-père i disouot « m’djife ») a n’comprénouot point. J’évnouos d’Paris, eune ville doù qu’chés neurmèles ch’est des « merles », chés aillots des « jonquilles », éch maristér « un instituteur » et pi chés vagances « des vacances ». Des vagances d’étè qu’éj passouos mon pépére et pi mémére qu’is habitoai’te Dérgny. Chu Parisien qu’j’étouos — et pi qu’éj sus coér — én situot Dérgny qu’à l’inconte éd Gamache, alors éq tortous chés Picards is savoai’te doù qu’ch’étouot Dérgny, tout d’meume ! Tandis qu’à mi, i follouot m’ésplitcheu toute. Drés chl’écminchmint d’chol jornèe, édvant m’bole éd cafè cœud, m’grand-mére a m’demandouot : « Veux-tu un piot molé d’catimourons aveuc tin gatieu battu, min piot ? — Oh non, mémére, oh non ! » J’étouos pour li dire qu’j’ém trouvouos d’trop jonne pour ém casseu m’pipe, pour « catimourir battu »… Mais m’bouque a s’aclichouot, à nin braire él réstant d’l’atlèe. M’grand-mére a m’érbéyouot sans dire érien étou, mais j’savouos bien qu’au fond d’elle él pinsouot : « qué boin piot, mais qu’il est rédeux ! » Oui, j’étouos drolatique, comme i disouot min grand-pére. Pour ceusses qu’is m’li’te ichi, « drolatique » o l’meume sinifiénche éq « drolibus », et pi « drolibus » ch’n’est point eune invintrie à Dlanöé pour arringeu chol cirtchulation din Paris. J’érviens à mi, à mn’histoére, qu’a dvient, durant un boin momint, eune histoére éd « qu’est-ch’est »… Qu’est-ch’est, pépère, d’awoér ses pieuds tout bouéyénès apreu awoér dansè din chés fraiqueteumes ? Qu’est-ch’est, mémére, éq chu djeulu tout étotchè pour awoér éd trop matchè dol tarte à l’badrèe ? Qu’est-ch’est, pépére, qu’éd n’point voloér és dessatcheu d’sin bér quante chu vint maouais i bérzille toute à l’intour d’és moaison ? Qu’est-ch’est, mémére, qu’éch cœut il o vnu dégratteu ch’guérdin, pour mucheu s’crotte din chés queutchilles ? « Vint, bérzilleu et pi queutchilles » os éreu comprins qu’chés vagances d’étè is avoai’te durè pu qu’eune coupe éd mouos, pi qu’oz étouot déjeu à l’saison d’chés gins matchès d’frouod, érniflant et pi lapant du flipe à l’tonne pour és récauffeu. Intér-deux, j’awouos meume étè à l’école éd Dérgny, aveuc chés piots Picards qu’is m’érbéyoai’te conme chu horzin qu’j’étouos. Et pi tojours intimidè pèr chés mots coér muchès din mi, pi qu’i m’follouot tracheu (hérmonneu, meume) din mn’ésprit pour pèrleu leu langage. Chés nasus leu is m’avoai’te meume donnè un surpitchet, un bieu : j’étouos chu Mourlonneu. D’tous sins, tortous chés gins d’Dérgny is avoai’te un surpitchet. No voésin, ch’étouot chu Lion, pasqu’il éclaboussouot toute. Pu loin, i y awouot La France, érpeupleur d’éch poéyi aveuc chés tchinze nasus, et pi aussi Piot d’hier, et pi ch’Pleupleu, pi un patchet d’eutes qu’is n’m’érvienn’te point. Mi tou, j’érouos pu éte éch Pleupleu, aveuc émn usine à tchéstionnage ! Un pleupleu qu’i pèrlouot d’miu in miu, éd pu in pu affranchi, et pi qu’i put meume lire, él soér éd Nouvel An, un mot qu’al avouot écrit s’grand-mére : Min piot, J’t’ai foait un gatieu Tu freus conme éch leu à cht’égneu : T’avalreus toute, Et pi quante véreu l’énèe tchivient Tu nn’érereus coér éddin tes dins… Achteure, i m’réste couér un piot molé d’gatieu éddin mes dints, un piot molé d’mots et pi granmint d’rapinsemints qu’is pass’te ichi dvant mes tchintchets ,conme énhui chés coureus du Tour. Jacques CAUDA in Ch'Lanchron n°107